అపరాధిని యేసయ్య కృప జూపి

సిలువకు నిను నే గొట్టితిని తులవలతో జేరితిని కలుషంబులను మోపితిని దోషుండనేను ప్రభువా ||అపరాధిని యేసయ్య||

ప్రక్కలో బల్లెపుపోటు గ్రక్కున పొడిచితి నేనే మిక్కిలి బాధించితిని మక్కువ జూపితివయ్యో ||అపరాధిని యేసయ్య||

ముళ్లతో కిరీటంబు నల్లి నీ శిరమున నిడితి నా వల్ల నేరమాయె చల్లని దయగల తండ్రీ ||అపరాధిని యేసయ్య||

దాహంబు గొనగా చేదు చిరకను ద్రావనిడితి ద్రోహుండనై జేసితినీ దేహంబుగాయంబులను ||అపరాధిని యేసయ్య||

ఘోరంబుగా దూరితిని నేరంబులను జేసితిని క్రూరుండనై గొట్టితిని ఘోరంపు పాపిని దేవా ||అపరాధిని యేసయ్య||

చిందితి రక్తము నాకై పొందిన దెబ్బలచేత నిందలు పెట్టితినయ్యో సందేహమేలనయ్యా ||అపరాధిని యేసయ్య||

శిక్షకు పాత్రుడనయ్యా రక్షణ దెచ్చితివయ్యా అక్షయ భాగ్యము నియ్య మోక్షంబు జూపితివయ్యా ||అపరాధిని యేసయ్య||